പുതുമകള്‍.

അതിരില്ലാതെ നിര്‍ഗ്ഗമിക്കുന്ന പ്രവാഹം പോലെ,എന്നും മറന്നു വയ്ക്കാനായി ചിലതിനെ ഓര്‍ത്തിരിക്കണം. ഓരോ ചുവടിലും പുതുമയുണ്ട്. ചില പുഷ്പങ്ങള്‍ക്ക് സുഗന്ധമില്ല.ഇതാണ് ജീവിതം എന്ന്പറയാന്‍ പ്രാപ്തിയുമില്ല. ആകസ്മിതയുടെ നനഞ്ഞ വഴി എന്റേത് മാത്രം. കഥകള്‍ പറഞ്ഞുകൊണ്ടേയിരിക്കാം.

ചിന്തകൾ.

സ്വരുക്കൂട്ടിവച്ച സ്വപ്നങ്ങളെ കാറ്റ് ചിക്കിപ്പരത്തിയിട്ടും, ഊഞ്ഞാലാടുന്നു വെറുതെ ഈ ചിന്തകൾ.....

മാപ്പ്.

വിസ്മരിക്കാന്‍ എളുതല്ല. മറവിയുടെ മറുപുറത്ത് ഓര്‍മ്മകള്‍ ചിലത് കോറിയിടുന്നു. ഓരോ ചുവടുകളും ചിത്രം വരക്കുമ്പോള്‍, സ്നേഹത്തില്‍ പൊതിഞ്ഞ ഒരു കുഞ്ഞുമാപ്പ് മതി.

ചുവടുകൾ

മായാജാലവും വർണപ്പകിട്ടും നവമോഹങ്ങളും ആകസ്മികതയും ഓർമത്തെറ്റും പിന്നെ അപരിഹാര്യമായ നോവും മനസ്സ് നിറക്കുമ്പോൾ, നൂതനമായ പ്രതീക്ഷയോടെ ആവേശത്തോടെ ചുവടുകൾ വച്ച് പ്രയാണം ആരംഭിക്കട്ടെ.

തുലാവർഷം

മാനം മൂടി കാർമേഘങ്ങൾ. നനച്ചുണക്കാൻ ഇത്തിരി സ്വപ്നങ്ങളും, കാറ്റും മഴയും ഞാനും.

നനവ്‌

കാട്ടുപൂവിന്റെ നേര്‍ത്ത സുഗന്ധം.
നിര്‍വികാരമായി വാരിച്ചുറ്റിയ ഓര്‍മ്മകള്‍.
പതിയെ വന്നണയുന്ന നോവുകള്‍.
അതിരുകള്‍ വിലക്കുന്ന മര്‍മ്മരങ്ങള്‍.
പെയ്യാമഴയില്‍ നനഞ്ഞ് നനഞ്ഞ്
എപ്പോഴാണ് ഞാന്‍ കുതിര്‍ന്ന് പോയത്?

കാത്തിരിപ്പ്.

ഒരു ശപഥത്തിന്‍റെ

ഞാണൊലിയില്‍

പ്രകമ്പനം കൊള്ളാതെ,

ഒരായുസ്സിന്റെ പൂര്‍ണ്ണതയില്‍

മുങ്ങിനിറയാതെ,

അകല്‍ച്ചയുടെ കൊടി വീശി

ശകുനങ്ങളുടെ പടനയിച്ച്‌

മറഞ്ഞിരുന്നിട്ടും,

കാത്തിരിക്കാതെ വയ്യിനി.......